Saturday, November 10, 2007

وبعدها..


وبعدها ..

ألقى فى عينيا قهوة تكفى الكون سهر

والليل عقيم

ورا ضلمته يولد غمام يوأد قمر

وألقى فى عينيها م التعاليل مكتبة..

شروح كتيير مترتبة

عن القضا .. عن القدر

عن الطريق اللى اختلف

عن انى لازم أعترف

بان ربك لما بيسبب سبب

فوق الجبين راح ينكتب

----------

وبعدها ..

وبعدهالك يا أنا

فكرنى لو عقلى نسى

هوه البشر منا مسير ولا بين ايده اختيار

بندول نحاسى مفتخر

مكتوبله انه كل ثانية راح يتك ..

ولا يحيد عن المدارهوه احنا ليه لما نلاقى القلب مش قادر يطيق

انه يكمل خطوته فى نفس الطريق

وتهزنا رياح الحمول

نبدأ نقول ..

نبدأ نعيد مضغ اللبانة اللى لقينا طعمها..

طعم القدر

-----------

وبعدها ..

ألقانا جوه كل نظرات البشر

حدوتة طايرة بجناحين

من عين لعين

ضيفة فى حلقات السمر

نبقى حكاوى بتتسرد

صفحة جرايد تتفرد

وأنا عرفت ان الجرايد ياما ياما اتكلمت

شفتوا اللى حاصل بين فلانة وبين فلان"

"

وألقى عينين مدهونة من بره خضار

تسألنى ياما فى انبهار

عن اللى صار

وتنتهى كلماتنا دايما بالآسف

وأنا أهز راسى للآسف

وأفتح جرايد تانى يوم

ألقى الكلام اللى جرا ..

مانشيت أحمر ينقرا

--------

وبعدها..

وبعدها..

وبعدها..

البن من عينى يجف

يرسم خطوط مستقبلى

علمنى ليلى أقرا فنجان الحياة

علمنى أشرب قهوتى بسكر زيادة ع الدوام

الليل فى ليلى راح يمر

والعمر عمر ..

مفهوش دوام..

الا لتغير الفصول

بين يوم شقابين يوم ساعاته مزوقة

وبكرة حكايتنا القديمة تتركن ..

فوقها التراب..

فوقها الزمن

ونظرتك لما تقابل نظرتى تلقى اغتراب

وقصتك .. أبدا ما هتكون قصتى

هتكونى فصل من الكتاب..

بيتنسى

تقع عناوينه كمان م الفهرسة

وتنشغل كل العيون عنا بحكاية ممتعة

متحوطة ببروز أسى

وأمشى فى جنازة ذكرى ماتت للآبد

وانتى معاها فى التابوت

أما أنا لما أموت

راح تنبعث جواى حياة

من بعدها..

ولبعدها..

Featured Post

ليه بحب صبا مبارك؟

 عايز تقيم موهبة بحق وحقيقي؟ شوف قدمت ايه وتابعها على مختلف مراحلها وقيم اختياراتها وهي وصلت لإيه ..انا مش هنسى لصبا دخلتها ال...