أنجلينا جولي برقبتكم..

ممكن كلامي مايعجبش ناس كتيرة... وممكن كمان محدش يقرا اللي هكتبه قبل ما أدخل في الكلام واشرح بوجه كلامي لمين.. وعن إيه.. أحب أتكلم الأول وأنم شوية عن أنجيلينا جولي هكسب شوية سيئات بس همحيها في الكلام اللي هيجي بعد كده "واثقة في نفسي" :)

مين انجلينا جولي معظمنا يعرفها بس راجل الشارع البسيط مايعرفهاش.. او يعرف انها استغفر الله العظيم ست مش ولا بد وافلامها مش ولا بده و"يدور وشه" وممكن لما تسأله يفتكر انك مش ولا بد :) خلونا نكلم نفسنا عالنت وبعدين نشوف هنعمل ايه مع الناس في الشارع.. أغلبنا شوفنا أفلام لأنجلينا جولي.. وكعادة الأفلام الأجنبية لا تخلو من المشاهد اللي اكيد واي حد بيتفرج على اي فيلم صادفته وجود المشاهد.. تحديدا أنجلينا جولي معظم افلامها تحوي الكثير من المشاهد اللي بتخدش حياء اي فرد في مجتمع شرقي متمسك بعلاقته مع ربه وبأخلاق مجتمعه.. ممكن تكون المشاهد دي ليها تفسير ان ده مجتمع غربي ومجتمع بعيد عن الدين.. ده غير ان نظام الحياة الشخصية هناك "اللي هي ماتخصناش" بعيدة برضه عن اي اخلاق او دين  "مش مشكلتنا"

غير المشاهد السيئة اللي قامت بها أنجيلينا جولي في معظم افلامها.. أنجلينا جولي بتدعم حقوق المثليين في الزواج "اسمع حد بيقول يا خبر استغفر الله وممكن يخبي وشه قال يعني اتكسف" أنجلينا بتدعم هذا النوع اللي بعيد برضه عن اي دين وعن اي اخلاق.. بعكس والدة براد بيت اللي بتحارب هذا النوع المتخلف من الزواج.. واللي تقريبا بتتخانق مع جولي عشان بنت جولي ما تتشبهش بالولاد "مشاكل عائلية مالناش علاقة برضه"

-    ممكن اي حد يجرب يكتب اسم أنجلينا جولي على جوجل يشوف ايه اول النتائج اللي هتظهر وعملتها برينت سكرين عشان نبعد عن الإتهامات هنلاقي من الحاجات اللي متصدرة "أنجلينا جولي للكبار فقط – أنجلينا جولي والجنس – أنجلينا جولي وانطونيو بانديراس"

-هنلاقي دلوقتي اللي قاعد يقول ديه هتولع في نار جهنم دي مصيرها جهنم وبئس المصير، وممكن كمان بعد ما يقول الكلام ده يروح يقعد بينه وبين نفسه يدور على فيديوهات يشوفهالها "أصله عايز يتأكد انها هتدخل النار" :)

-    خلاص كلنا نمينا الحمد لله وعرفنا انها هتدخل النار وبنتحاور دلوقتي هتدخل انهي باب من ابواب جهنم بقى؟؟؟ طب هتولع بالنار ولا بالجاز والبنزين؟؟؟ طيب خلونا نكمل وبعدين نشوف طريقة نحرقها او يمكن نحرق نفسنا ونولع في نفسنا أحسن..

بجانب كل الحاجات الفلة اللي اتقالت فوق.. نجرب نكتب على جوجل أنجلينا جولي "ويكيبديا" مع ان ويكبيديا سهل التحريف فيه بس هجبلكم كذا مصدر..

هيظهرلنا
مساهمتها الإنسانية

    منحت مليون دولار لأحد معسكرات اللجوء الأفغاني في باكستان
    مليون دولار لمنظمة أطباء بلا حدود.
    مليون دولار لمنظمة الطفل العالمي.
    مليون دولار لمنظمة غلوبال إيدز أليانس.
    مليون دولار لمنكوبي دارفور.
    5 ملايين دولار لأطفال كمبوديا.
    100 ألف دولار لمؤسسة دانيال بيرل

في زيارتها الثالثة للعراق  قدمت دعما مادياً ومعنوياً لمئات الآلاف من اللاجئين العراقيين داخل وخارج العراق... زارت مخيمات اللاجئين بلبنان. واللاجئين الصوماليين بكينيا. وزارت أفغانستان. الصومال. باكستان. دارفور. سلفادور. تنزانيا. سيراليون وغيرها بشاحنات محملة بملايين الدولارات وبمختلف أنواع الأغذية والأدوية والأطعمة

طيب عايزين نشوف مصدر أحسن: يلا بينا:
تعمل الممثلة الاميركية انجلينا جولي بصحبة براد بيت على توزيع المساعدات للاجئين على الحدود السورية، في محاولة لتسليط الضوء على معاناتهم ونشر ثقافة الانسانية والشعور بالغير.

جدير بالذكر أن الممثلة الأمريكية جولي بكت في مقابلة تليفزيونية على أحدى الفضائيات التركية على ما يحدث في سوريا عندما شاهدت عدد من صور أطفال سوريا الذين قتلوا في الاحداث هناك.


أنجلينا جولي تتبرع بـ100 ألف دولار للاجئي سوريا
http://www.alarabiya.net/articles/2012/06/21/221854.html

Turkey: Angelina Jolie Meets Syrian Refugees
http://www.youtube.com/watch?v=P_m1ifGNL5Y

Angelina Jolie Visits Haiti
http://www.youtube.com/watch?v=H5zbHaOOgNE&feature=relmfu

Angelina Jolie and brad Pitt in Pakistan
http://www.youtube.com/watch?v=LF0DHqXpal0&feature=related

Angelina Jolie in Iraq
http://www.youtube.com/watch?v=PcY5xS69YAo&feature=related

Angelina Jolie Returns to Kabul
http://www.youtube.com/watch?v=0xW93QOso6M&feature=related

Angelina Jolie Returns to Chad
http://www.youtube.com/watch?v=blMplPRb7Zc&feature=related


ANGELINA JOLIE VISITS TUNISIA-LIBYA BORDER
http://www.youtube.com/watch?v=k0z92kQe2xw

Angelina Jolie Visits Somali Refugees
http://www.youtube.com/watch?v=OhAMu4v79bo


-    ومصادر كتير "بس اللي يدور هيلاقيها" هل نسبة الناس اللي بيدوروا لأنجلينا لفيديوهات من النوع الأولاني نفس نسبة الناس اللي بيدوروا لأنجلينا على الفيديوهات الثانية ؟؟؟ هل  الناس عارفة مواقف أنجلينا؟؟؟؟ طب ها حابين نقعد نحلل ونقول هتدخل جنة ولا نار؟؟ بقينا محللين من عند ربنا ملايكة إحنا صح؟؟؟ بنحاسب الناس على أخطائها ولما يعملوا حاجات كويسة ندور وشنا ونستشهد بايات قرأنية في غير مواضعها وكلام كبير خلينا الغير مسلمين يستغربوا من تصرفاتنا.. بدل ما نكون صورة مشرفة لديننا جزء كبير منا خاد ديننا كصورة بس بيلبسها قدام الناس.. منهم الإخوان اللي لا ليهم علاقة من بعيد ولا من قريب باللي بتعمله أنجلينا ..اللي لازم يشيلوا كلمة مسلمين من لقبهم "لا دخل الدين بالسياسة ".. فالحين بس يحللوا ويكفروا اي حاجة وهم نفسهم مش فاهمين حاجة وبيحاسبوا الناس.. بتحاسبوا الناس على إيه.. انتوا ربنا مثلا؟؟؟

هاتوا بقى دفتر حساب زي ما بتحاسبوا الناس يلا نتحاسب بقى أصلنا كلنا فاضيين ووصلنا ليوم القيامة وقاعدين عمالين نحاسب بعض.. ها انتوا عملتوا إيه؟؟؟؟ فالحين بس تنزلوا للناس الفقيرة وقت الإنتخابات بالسكر والزيت وأكثر وقت الصور والفيديوهات تتنشر فيه عنكم انكم بتعملوا خير هو وقت الإنتخابات؟!! طب لو انتوا بتعملوا خير ويا عم نقول انكم احسن من انجلينا كمان عملتوا ايه على ارض الواقع؟؟؟؟؟ بنيتوا ايه عمرتوا ايه شغلتوا مين ظبطوا ايه.. شبعتوا مين؟؟؟؟ "الله يحرقكوا" جزء منكم بيستخدم الدين كشعار؟؟؟ خليتوا ناس مسلمين خايفين يقولوا انهم مسلمين عشان الصورة الزفت اللي انتوا بتمثلوها.. الإسلام دين حب ورحمة الإسلام بساطة مش تعقيد.. الإسلام ابسط بكتير من ما تمثلوه "ربنا يحرقكوا برضه"

خليتوا واحدة محجبة اللي هو انا.. بكون عايزة افسر للناس ان حجابي مش معناه اني متخلفة.. عشان الصورة اللي بتمثلوها عننا.. عشان الشيوخ الفلة الشمعمة منورة اللي بيطلعوا يرهبوا الناس في التلفزيون...  ممكن اكون محجبة ومش متزمة بالدين ولا بعمل بيه يبقى مالوش لازمة وممكن اكون مش محجبة واحسن مليون مرة من اي واحدة محجبة.. الدين مش مظاهر ياللي بتتكلموا بإسم الدين.. مش عايزة تعليق من حد يوصف نفسه ربنا عليا..


ما شاء الله عليكم كمان عاملين كناة أتفال منكبات؟؟؟؟ عايزين الأطفال يطلعوا معقدين ولا مرضى ؟؟؟ ناقصين امراض في المجتمع؟؟ ربنا يحرقكم

ظهر دعاة دين معتدلين الفترة الأخيرة والواحد قال الحمد لله اهوم ناس معتدلين في وسط ناس هبل هيعدلوا المايلة..وظهرتولنا على الساحة السياسية ويا ريتنا شوفنا حاجة عدلة منكم ياللي بتتكلموا بإسم الدين.. مش كفاية القنوات المتخلفة اللي عاملينها اللي بتتكلم بإسم الدين وكل حد فيها قاعد يزعق ويرهب الناس.. واللي فيها "وقالت الصناديق للدين نعم" نعم الله عليك..


اخر حاجة في النقطة دي لو عندنا واحد غير مسلم وواحد مسلم مين اللي هيدخل الجنة؟ طب لو المسلم ده اخلاقه زفت والغير مسلم زي الفل؟؟ مين اللي هيدخل الجنة ياللي بتتكلموا بإسم الدين وانتوا مش فاهمينه.. ؟؟ هل كده أنجلينا جولي هتدخل النار ياللي شاغلين نفسكم بغيركم؟؟؟؟ في اعتقادي الشخصي ان ربنا رب قلوب.. وان الإسلام معناه أعمق واشمل وليه معاني كتيره جدا.. في اعتقادي الشخصي ان الجنة غير مخصصة لمن يحمل فقط الهوية الإسلامية.. في ناس مسلمة فقط اسما وشكلا.. ولكنها بعيدة كل البعد عن الدين الصح..

في ناس اتولدوا وهما على ديانة أهاليهم "الحمد لله على نعمة الإسلام"..  بس الناس دي مقتنعة بدينها ولا بتعمل حاجة غلط ولا حاجة بتغضب ربنا وبيعملوا حاجات خير بشكل كبير زي "أنجلينا جولي" بغض النظر عن اي حاجة ثانية سيئة عملتها.. الناس دي بتعمل خير بشكل كبير جدا..

 

يا ريت نبعد عن الشكليات اللي سبب تأخرنا لغاية دلوقتي يا ريت نفهم ديننا صح.. كفاية جهل وتخلف وامراض مجتمعية ونفاق.. كفاية تمثيل في الدين.. ديني بيني وبين ربي.. محدش يحاسب حد على شكله عامل إزاي.. شوفه فعله عامل إزاي.. قلدوا اللي بيعمله.. قلدوا أنجلينا يا بتوع الدين "مش بعمم" بتكلم على اللي فاهمين ديننا غلط.. بتكلم عن جهلة بيتكموا بإسم الدين ودخلوا ديننا في السياسة.. بتكلم عن الخير اللي مش بيتشاف..


اخر حاجة  هو فين فنانينا ؟؟؟ فينك يا عمرو دياب يا تامر حسني فينك يا منير يا شيرين يا أنغام.. فينك يا احمد السقا.. كريم عبد العزيز.. محمد هنيدي.. محمد سعد.. غادة عادل.. عادل إمام.. نور الشريف..  "ممكن حد يكمل كتابة باقي الاسماء" فينكم يا حبايبي يا حلويين؟؟ ألا مش البلد دي قامت فيها ثورة؟؟؟ طب أنا نفسي حد منكم يقولي رأيه إيه في اللي بتعمله أنجلينا جولي؟؟؟ تمثيل صح؟؟ أكشمن أنجلينا عايزة شو إعلامي يا حرام وإكشمن بلدها باعتاها تتجسس على البلاد التانية.. إكشمنها رأفت الهجان يعني صح؟؟؟
 

 فينكم من مصر؟؟؟ فين دوركم الله يرحمكم.. مش مصر المفروض كانت بتقود البلاد في مجال الفن قبل ما الدراما السورية تدخل والدراما التركية وبعدين بقينا الدراما الملوخية؟؟؟ مش مصر المفترض يعني الفن فيها متقدم إلى حد ما وبنعمل مشلشلات بملايين وافلام وكده وعندنا نجوم شباك ونجوم بلكونات ونجوم مطابخ؟؟؟ طب فينكم كلكم على بعضكم يا فنانين يا مصريين؟؟؟ مش مكسوفيين على دمكم؟؟؟

جزء منكم ظهر في الثورة واكتفى بدوره الثوري فقط ولكن ايه الأدوار الثانية اللي عملتوها؟؟ مخلينها بينكم وبين ربنا صح.. :)

وايه بعد الثورة اللي لسة مانجحتش فينكم؟؟ كلكم ظاهرينلنا بحاجة وسبعين مسلسل في رمضان وماشوفناش منكم حاجة عدلة لمصر؟؟؟ غير الأغاني الوتنية والكلمتين المحبوكيين في البرامج عملتوا إيه يا فنانين مصر؟؟؟؟ ده مسلسلاتكم الألفاظ فيها بقت بتنحدر بقى عادي جدا الاقي في مسلسل تلميح لمشاهد معينة وعادي جدا الاقي كلمة .... تيت وتيت وتيت.. هتقولولي اصل الفن مرأة المجتمع؟؟ طب بالنسبة للمجتمع تيجوا نقضي الويك اند الجاي في المجتمع ونفكر مع بعضينا ونشتغل مع بعضينا عليه ولا إيه؟؟

عملتوا إيه للمجتمع الضايع اخلاقيا ومعيشتيا وسياسيا وفنياً؟؟؟ عملتوا ايه لبلدكم عشان تقدروا تعملوا لسوريا وغيرها من البلدان؟؟؟ عملتوا إيه يا نجومنا يا قدوة ؟؟؟ عملتوا ايه؟؟ لو مش عايزين تدخلوا في السياسة فيه مليون طريقة تقدروا تعملوا بيها حاجة غير المسلسلات والأفلام وغير انكم تزوروا مستشفى سرطان الأطفال وتتبرعوا شوية... فيه طرق تانية..

إعتبروا يا أولوا الألباب.. وجعتوا قلوبنا على ديننا وعلى بلدنا وعلى الفن..

بس كده..

ملاحظة: كلامي ده موجه للي بيمثلوا الدين أسوأ تمثيل+ للفنانين والمغنيين الفلة..

شكر خاص: نهال صلاح