- محمد أمين راضي:
بيلعب في منطقة محدش بيلعب معاه فيها، المتابع لأعماله الثلاث (نيران صديقة، السبع وصايا، العهد) هيقف عند شخص غير تقليدي مجنون بأفكاره.. محدش في بدايته هيقدر يخاطر ويشارك في تنفيذ جرايمه لإنها عكس السائد فاللي هيوافق زي طارق الجنايني لازم يكون من نفس مدرسة محمد أمين راضي ولو مكانش من نفس المدرسة لازم يكون واثق في قدراته ومؤمن بأفكاره وبموهبته اللي محتاجة نقف عندها كثير.. محمد بيعتمد في مسلسلاته لغاية دلوقتي ان اللي قدامه يفكر يشغل مخه شويتين وهيعرف يوصل للموضوع فيه ناس مابتحبش المدرسة دي تحب ان اللي قدامها يسردلها المشكلة وحلها بدون تعب لكنه من أول عمل وهو بيحاول يلعب على الوتر ده.. لغاية ما العهد نجح مش مهم الترتيب الكام لإن مفيش إستفتاء منطقي وموثوق فيه وموضوعي بيتعمل تقدر تقيس النجاح ده لما الواحد يشوف ردود أفعال الناس دي كلها وانهم بيستنوا من حلقة للحلقة الثانية ويكتبوا كمان عن مسلسلهم المفضل فده نجاح .. العهد وصل تريند على تويتر أكثر من مرة وصبا مبارك مش عشان الفولورز نهائي.. ومش عشان بس شطارة فريق السوشيال ميديا.. الفريق كله شاطر بما فيهم فريق السوشيال ميديا وكل حاجة متعوب عليها عشان كده نجح.. المتابع للسوشيال ميديا هيلاقي فيه فنانين عندهم اضعاف اضعاف الفولورز الموجودين حالياً لكل فنانين المسلسل ولصفحة العهد نفسها لكنهم مقدروش يوصلوا لجمهورهم صح... محمد أمين راضي بييستخدم التابوهات وبيوظفها صح ومعظم المشاهد ليها إسقاطات على كل اللي مرينا وبنمر بيه فممكن ناس تشوف العهد من منظور ديني وحكم الاخوان والكذب والنفاق عشان يوصلوا للي عايزينه ممكن نستبدل العهد ده بـ "القرأن" بس مش القرأن بتاعنا قرأن الإخوان وتفسيرهم للأيات زي ما هم عايزين في المواقف اللي هتخدمهم.. (وأهالي الكفور اللي بالنسبالهم اي حد بيقول كلمتين من الكتاب يبقى ولي) ممكن ناس تانية تشوف العهد من منظور سياسي بحت للعك اللي حصل خلال الفترة اللي فاتت كلها.. (وهستشهد بمشهد قالته سوسن
#كندة في الحلقة الأخيرة لأهالي الكفور كل واحد ممكن يكون هو اللي هيعدل المايل طول ما هما مستنيين حد يجي يعدلهم المايل مفيش مايل هيتعدل وده ممكن يتطبق على حال البلد بدل حال اهالي الكفور) ممكن ناس تشوفها حرب بين الخير والشر والمشكلة بقى انك لما هتنحاز للخير هتلاقي ان مفيش خير ولا شر مطلق فهتلاقي نفسك جوه المسلسل ممكن تتعاطف مع قتالة وتلاقي دوافع ليها كمان طبعاً (الضوي) متعاطفتش معاه نهائي اكثر شخصية استفزتني يمكن عشان حقيقي بتفكرني بالإخوان.. وده نجاح لصبري فواز.. محمد أمين راضي بيلعب على المشاعر المختلطة عند الإنسان الحب والكره.. القوة والضعف وقلة الحيلة.. ميكس غريب النفس الإنسانية بضعفها قادر يجسدها بشكل واضح كإنه دارس علم نفس كويس.. محمد أمين راضي بيعوم ضد التيار وهفضل مراهنة على موهبته.. وانه هيعدل المايل
smile emoticon
2- خالد مرعي
متفقة مع الرأي اللي بيقول (لو الممثل أو المؤلف شاطر وباقي عناصر العمل خايبة يبقى العمل ده مش هينجح، هينجح ساعة ما كل عناصره يكونوا شاطرين) خالد مرعي خلاني اشوف ملحمة فنية بتتجسد على إيد أبطال العمل طلع احسن ما عندهم، بشوف لوحة فنية متكاملة مرسومة على إيدين هذا الشخص الواضح انه محب وشغوف جداً لشغله.. كل شوية يجي مشهد أقول
#برافو ايه الجمال ده تصوير عبقري أداء عبقري مشهد كله عبقري.. مش عشان الممثل هو اللي شاطر بس لأ ده عشان كل عناصر العمل شاطرة جداً والدليل على ده شغل محمد وخالد مع بعض خلانا نشوف فنانين من زوايا تانية زي هنا ورانيا يوسف وأيتن اللي قدموها بشكل مختلف في السبع وصايا وقدموا من جديد بشكل اكثر اختلافاً وهيكون تحول ليها في نوع شغلها في العهد وغيرهم..
3- البطولة الجماعية
مبحسش ان فيه حد أقل من التاني رغم ان مساحة أدوار الوجوه الجديدة عادة بتكون أقل من النجوم في اي اعمال تانية إلا ان مساحة أدوارهم في المسلسل لا تقل أهمية أبداً عن النجوم اللي بيشاركوهم اللي كل حد منهم ليه إسمه وجمهوره.. بحس وانا بتفرج كإني بتفرج على ماتش كورة كله بيباصي الكورة للتاني والتاني بيلعب بحرفنة ويشوطها للي جنبه.. كل حد متوظف صح وبيلعبها صح الصح وكل حد نجم حتى لو كان أول دور ليه كان في العهد.. كفاية بس الروح اللي ظاهرة على الشاشة..
4-
#فتحي أيتن عامر
ضحكتني بعفويتها وبخفة دمها وبغلبها وإيمانها بالعهد والبنت اللي هتعدل المايل وللأسف فيه ناس كثير زي فتحي مصدقين حاجات ممكن ماتكونش من الأساس موجودة..ولائها واخلاصها عشان توفي الندر مخلييني واقفة عندها كثير ومستنية اشوفها في باقي الاجزاء لانها مش هتقدر تستحمل كم التحول والناس اللي بتتعلق بيهم وبيموتوا
دول..
5-
#استمنوها سلوى خطاب
شغلها قبل كده كوم وشغلها مع محمد أمين راضي كوم تاني خالص.. حبيتها جداً بتعبيراتها وخلتني محتارة لا عارفة
هي كويسة ولا وحشة ولا هي عايزة الحق ولا عايزة تاخد ثارها..
6- صفوة
دي اللي كانت لما تقول (يا موكوس يا ابن الموكوسة أو أماه الله يخربيت أماه ويخربيتك منك ليها) بتوقعني من الضحك بتلقائيتها
#كنتي_فين_يا_صفوة من زمان
7- أروى جوده
اللي هتعدل المايل.. اللي غنت للغريب عشان يحن عالقلة .. اللي باقية للحق والخير.. ضحكتني بتحديها للضوي واتضايقتلها لما علاء بينسى اسمها ويندها بسحر.. وصدق من قال (العوالم أجدع من في المسلسل) أروى روحها خفيفة زجميلة في المسلسل وكنت حساها على طبيعيتها..
8- عهد المواهب
#علاء احمد مجدي دوره في المسلسل هيفرق معاه في شغله بعد كده وكان سبب انه يعرف الناس بموهبة واضح انها مش سهلة، أما
#أبي كنت بخاف منه بالمكياج اللي معموله.. بس شاطر انه وهو متكسح قدر يوصل للمشاهد.. و
#وليد_فواز المتحول اللي اثبت نفسه خلاص اللي فاجئني شخصياً بدوره والميكس الغريب من الشر للخير بعد زيارة مشعل ليه وليد ماشي على نار هادية ولكن النار دي برغم انها هادية لكنها شكلته كويس قوي وقدمت السنادي شخص مختلف تماماً عن اللي شوفناه السنة اللي فاتت، و
#العوضي اللي عرفت انه اتدرب 3 شهور في الجيم عشان يكون مناسب للدور اللي مثله.. و#نجار كيلاني.. و مشهد معاذ الكساسبة كان قوي ودوره كان مستفز ..
مش ناسية كنده علوش بمشهد موتها ومشهد تعذيبها ولا صبري فواز اللي ركبه عفريت اسمه الفن.. ولا قتالة القتلة الجميلة
#هنا_شيحة ومشهد محاولتها عشان تقطع ايدها وتشيل الوشم ومش ناسية ياسر المصري
#مشعل وأسر ياسين..وغادة عادل اللي فاجئتني بالتطور اللي حصلها وشيرين رضا الإسم على مسمى في المسلسل
#جومر.
وأخيراً وليس أخراً مسك الختام
#صبا_مبارك heart emoticon
===========================
الفنان الموهوب مابيتقاسش بعدد الحلقات اللي صورها او اللي فاضل عايش فيها يعني لو دخلة صبا مبارك
#ريا كانت
موتها هتفضل برضه معلمة جوه الواحد خاصة ان دخلتها بس تاخد عليها أوسكار.. من العناصر الأساسية واللي فارق وجودها ومخلية الواحد Full of attention وهي بتمثل.. احساسها صادق وواصل مشاعر مختلطة ضعف على قوة كوليكشن غريب من أساس صفات البشرية منذ خلق الخليقة.. من الناس اللي الواحد حيران في تصنيفها في المسلسل يشوفها بتقتل في اول مشهد وبرغم ده مايخيلش عليه التظاهر بالقوة اللي هي عملاه لإنها زي كثير قوي اللي ظاهر عليهم غير اللي جواهم وتعدي الحلقات ويظهر الضعف اللي جواها وانها بتستخبي في العيل اللي عايزاه يكون جدر ليها في الكفور بس مش عارفة تخلفه، بتستخبي ورا القناع اللي ضاحكة بيه عالناس الواحد خلته يتعاطف معاها وينكر وجود شرها وان وجد يلاقيله مبررات كمان ولأ وإيه لما تهرب يفرح بهروبها ولما تتقتل يزعل عليها..
أقوى مشاهدها في العهد
==============
- دخلة صبا ثم الدخلة ثم الدخلة لوحدها اوسكار
- مشهد ولادتها
- مشهد قراءة العهد والاتفاق على تقسيم الكفور
- مشهد تصديقها لحلم علاء اللي كذب فيه انها هتتقتل
- مشهد محاولة قتل أكمل
- مشهد تمثيلها قدام سكينة وأكمل على انها سقطت وبتموت
- مشهد قتلها للي كانت بتولدها
- مشهد مواجهتها للضوي وكلامها لأكمل في الحبس
- مشهد اعترافها لبناتها وانتحارها
- مشهد نصيحتها لأكمل يهتم ببناته (الحلقة الأخيرة)
واضح ان ريا هنشوفها في بنتها اللي هتاخد بتار مامتها في الأجزاء الجاية.. برافو يا صبا أتقنتي الدور والواحد فارحنلك حقيقي لإنك تستحقي ولإنك غبتي عن مصر السنة اللي فاتت وكنت متأكدة ان رجعتك هتكون مختلفة وهتسيبي بصمة، والمرادي دخلتي للجمهور المصري والعربي من جديد من أوسع أبوابه وعلمتي جامد معاهم
صبا ممثلة بتمثل بروحها ..بتلبس الشخصية.. ممثلة شاطرة ومحترفة وتقدر توصل من غير ولا كلمة كل حاجة وعكسها.. ممثلة كاريزمتها مش في شكلها ولا في ثقافتها اللي كل الناس اتكلموا عليهم.. صبا كاريزمتها في روحها في انها مصدقة اللي بتعمله قوي وصادقة فيه.. كاريزمتها في احترامها لعقلية الجمهور اللي بتخاطبه في ذكائها في شخصيتها.. كاريزمتها انها مختلفة بتقدم السهل الممتنع زي ما قالت عنها د. هالة سرحان.. الواحد عمره ما يحس انها غريبة عنه أبداً من كل بيت ومن كل بلد.. ورغم ده كاريزمتها انها مش شبه حد.. شكراً صبا heart emoticon
heart emoticon شكراً heart emoticon لـ محمد أمين راضي، خالد مرعي، هشام نزيه، طارق الجنايني شكراً لكل فريق العمل وفريق السوشيال ميديا.. شكراً للمسؤول عن الكاستينج ومصممة الأزياء والديكور.. شكراً لكل الفريق سواء اللي ذكرت أسمائهم أو اللي وقعوا مني..
* حاولت اسرد كل مشاهد العهد اللي عجبتني لقيت ان المشاهد اللي عجبتني بس محتاجة بوست لوحده.. العهد بالنسبالي تجربة كاملة ماينفعش تتقيم غير كلها على بعضها.. الواحد اتبسط وهو بيتفرج ورافع شعار انه بيشجع اللعبة الحلوة ولعبتكم كانت حلوة ومتعوب عليها في انتظار باقي الأجزاء..
مبروك علينا انتوا..
