فى ديوان "وبعدها" لهيثم دبور هكتبلكم قصيدة منه بعنوان "صورة جماعية" الديوان جميل والقصيدة دى من اقرب الحاجات ليا
"صورة جماعية"
البوم صور
أدان يدن ونتجمع
ومدفع يدوى ويسمع
وبنسمى
وبنا حلم بنعيشه
قميص يومى بكراميشه
وأكل أمى
وأه لو دقت أكل أمى
وأنا سفيف...
لكن فى اللمة ببقى غول
ومع ذلك تملى بقول
أنا فى الآكل مبفكرش
وبشرب ضحكة فى عنيكو بشراب الورد
وبقى دا بيزداد عرض ...
من الضحكة
يدور بينا شريط سيما
لكام ذكرى...
وكام قعده
بنتلاقى على عشوة
على القهوة
تكهرب فى الدماغ فكرة
تخوفنى...
بخاف بكرة
بخاف لتكون أخر مرة
يجمعنا الرغيف والملح
......
ألبوم صور
ولما شفته هيسبنا
ويوعدنا ماهيعوق
كسرت ضلوعه بين حضنى
وفتفت قلبى بين حضنه
بيسحب دمعة م الخندق
وبيدارى حباب عنيه لتتكلم
لتفتن انه بيسلم
ومش هيعود
ضحك ليا وقال راجع
تراهنى بتلاتة جنيه
أشيل نضارتى والننى للاقى الدمع يغلبنى
وأهونها على نفسى
أكيد راجع
دا عمر الغربة ماتقسى
ولا تنسى
يفوت بيننا زمان وزمان
ويوصلنى جواب منه
بلا سلامات...بلا أشواق ..بلا حاجة
جواب فاضى وفيه جواه تلات ورقات...
تلاتة جنيه..
...
أخلص لعب فى التصاوير
وبغرق بين بحور تفكير
أدور فيها ع اللمة
وجوايا سؤال لما...
هيحنيلى الزمن ضهرى
ويبقى الدهر مش دهرى
يميل ايدى على عكاز
ويهبد جسمى فوق كرسى بعجل داير
تدور الرحلة وأنا فيها
ساعات ماشى..وساعات طاير
يدوخ عجل الزمان م اللف
فميلفش ..وميدورشى..وأنا أمشى..
من الصورة اللى جمعانا
أشوف الكادر من بره ماألاقى وقت أفكركو بمعاد موتى
وأشوفكو لو هتفتكروا...
وتفتكروا ..؟
هنتلم فى جماعة ازاى؟
وامتا وفين؟
وتفتكروا ...؟
بتبعد ليه خطاوينا فى غمضة عين
وتفتكروا وتفتكروا...؟
هنلقى فى يوم صديق منا يضيع حلمه..
يضيع فكره
وتتسرسب أمانينا
وتبقى دمعة فى عنينا
وليه تدمع على حاجة
ماهو اللى فينا يكفينا
وليه كنا؟؟
بنستخدم ضمير "احنا"
وليه رحنا ؟
ومرجعناش
وليه الدنيا متسعناش ..سوى فى صورة
وليه تركب قلوبنا ميكروباص زحمة
وليه تتفرفط اللمه
كما الرمان
وتفتكروا .. وأنا معاكو
وأنا فى صغرى
يعدى الضهر من بعده جنازه حد معرفهوش
نصلى عليه
نلاقينا فى مسجد فاضى من أهله
نلاقى الدنيا من حواليه
فضا واسع..وتوهة ناس..
مابين مزحوم
مابين مزكوم
مابين عالم نست خالص
ولا افتكروا..
وتفتكروا وتفتكروا..؟
فى يوم ما أمشى من الصورة اللى جمعانا
وأشوف الكادر من بره ما ألاقى وقت أفكركوا بمعاد موتى
وأشوفكو لو هتفتكروا..
هتفتكروا...؟؟؟
19 comments:
يااااه
تدوينة جديدة من زمان
بس جميلة جدا ما شاء الله
والقصيدة فيها عاطفة عالية أوي
ربنا يكرمك
ربنا يكرمك ع التدوينة
احيانا مش بيكون الشخص نفسه هو اللي خارج نطاق الخدمة
بل قد يكون محيطه الانساني هو اللي خارج نظاق الخدمة .. بينما الشخص نفسه حسه الاتصالي عالي جدا
لا اله الا الله
شكلك منحوسه يا بنتى
رابع مره ابعت الرد ده والنت يفصل
على العموم يعنى انا كنت بقولك ان الكلام ده كويس
والله كنت كاتبه كتير
حظك بقى
:D
سلام عليكم
حسيت كدا انك رومانسية وبتحبي الوحده
ريــــــــــــــــــم
عايز اقلك ان التدوينة رائعة ماشاء الله
ربنا يقويكى
بس تعرفى انا مش هلومك المرة دة عالكآبة
لانى بردة خارج نطاق الحياة والحمد لله
وافضل كدة اليومين دول
يلا ربنا يقويكى
سلام عليكم
ريم وحشتيني موووووووت
التدوينة جميلة يا ريم
ومتنسيش تدعيلي ان النت يرجع عشان الواحد مفتقده اوي
ومش قدره اعيش من غيره
محمد رفعت
اسفة على غيابى عن المدونة ان شاء الله مش هطول تانى وشكرا على كلامك
أحمد شلبى
عندك حق ان ممكن يكون محيط الانسان نفسه خارج نطاق الحياة وممكن الشخص نفسه بردو بسبب الظروف اللى بيتعرضلها يبقى خارج نطاق الحياة شكرا على كلامك
سمر ماهر
اهلا اهلا نورتى المدونة مفيش مشاكل المهم انك نورتينى هنا فى المدونة
محمد عبد الجليل
مش عارفة ممكن يكون احساسك صح مش هقدر احكم على نفسى
هشام طلحة
شكرا على كلامك ربنا يكرمك على الدعاء ويارب منبقاش خارج نطاق الحياة على طول
صرخة الاقصى
وانتى كمان ياهوبة وحشتينى وان شاء الله النت يرجع قريب عندك
السلام عليكم
شكلك رومانسيه
وكمان بيحبي الوحده اوي
بس بصراحه بوست جامد جدا
برافوووووو
اتمني زيارتك
تحياتي
السلام عليكم و رحمة الله و بركاته/
بجد واحشتني تدويناتك ..مع ان دي رجعت لي الاحباط حبتين..عموما ولا يهمك..القصيدة جميلة وحسيتها اوي خصوصا الجزء الاخراني-اللهم لا تردني لارذل العمر-,اللي زعلني اني اكتشفت اني مليش صور مع اصدقائي....يمكن عشان مليش اصدقاء اساسا:).
عامة,ربنا يعينك و يعيننا جميعا و نبقي في نطاق الخدمة.آآآآآآآآآآآمين.
yallaالسلام عليكم.
صديقتى العزيزة ريم وحياة النبى يا شيخة لا تخرجى بقى ، أخرجى ، مفيش وقت طويل بيستنانا ، خدى بالك الزمن مش بيعدى ، أحنا اللى بنعدى ياريم .. أخرجى بقى ...
جميلة اوي
شاب نفسه يحقق حلمه
شكرا ربنا يخليك ويارب يكون البوست عجبك واتمنى انك تحقق حلمك وشكرا على زيارتك
sasa
اهلا ياسارة نورتينى انا اسفة بجد حسيت انى احبطت ناس كتييرة
مش عارفة اقولك ايه بس متحكميش دلوقتى ان عندك صور مع اصدقائك اوى او عندك اصدقاء او لا هتلاقى فى حياتك ولو حد واحد بس يستاهل كلمة صديق ولو ملقتيش هتلاقى قدام خلى عندك امل ياسارة ان اللى جاى احسن بكتييير وربنا يخليكى على كلامك والدعاء
سهى ذكى
بجد بجد بفرح اوى لما بلاقيكى هنا نورتى المدونة كلها
كلامك بجد هحاول اعمله وربنا يسهلها شكرا بجد على زيارتك وهحاول بجد اخرج
تحياتى ليكى
كراكيب نهى محمود
اهلا اهلا بجد كمان نورتي المدونة
سهى ذكى ونهى محمود هنا بجد شكرا ليكى
تحياتى
ريم
انتى انسانه كويسه انا حاسس بده كويس والتدوينه جميله وكتير اوى بنبقى خارج نطاق الحياه المهم ان احنا لازم نرجع ولازم نكون داخل نطاق الحياه
سلام عليكم..
ازيك يا ريم..اول مرة ادخل على مدونتك..ما شاء الله جميلة..يااارب دايما تبقى فى احسن صورة
ماشاء الله..القصيدة تحفة..الكلمات..الاحساس..الموضوع نفسه ..بجد اثرت فيا خاصة عند الجزء بتاع..وليه الدنيا ما تسعناش سوى فى صورة.
عايزة اقول كمان ان الرد بتاع احمد شلبى عجبنى جددا..الله يكرمك يا احمد
وعايزة اقولك يا ريمان كل انسان بتيجى عليه فترة بيبقى خارج نطاق الخدمة..ظروفه بتبقى هى السبب..بس سرعان ما بيرجع وبيبقى احسن من الاول
ربنا يكرمك يارب و يدخلك فى نطاق الخدمة..
وعلى فكرة..انا فية شبه منك..بعتبر كل موقف فى حياتى صورة..منها اللى يعلق معايا و منها اللى يتنسى...فى صور حلوة..وصور مش قوى يعنى(:
ومعلش..الرد جه متأخر شوية..
سلام يا حبيبتى
خلود
عمر الببلاوى
مش عارفة اقولك ايه غير انى بشكرك ويارب يكون احساسك صح
وموافقاك فى الرأى ان لازم الانسان يرجع من خارج نطاق الحياة لنطاق الحياة بس اوقات كتييرة الانسان بيسيب نفسه للحزن يخنقه لغاية مايحس انه خارج الخدمة
شكرا لكلامك ومرورك
تحياتى
خلود
نورتينى ياخلود كلامك طبعا صح
بتمنى تكون القصيدة عجبتك والشكر هيكون للشاعر "هيثم دبور" هنا
تحياتى
انا ماقريتش حاجة لانى لسة متفاجئ جدا
انتى يا بنوتة عاملة مدونة و انا ماعرفش
100000000000000000مبروك جدا
و مبروك للتدوين كمان
ربنا يذهب عنك الهم والحزن ويرزقك كل خير
على الآلفى
اهلا اهلا بجد نورت المدونة كلها
الله يبارك فيك ويارب المدونة تعجبك
شكرا ياعلى ربنا يخليك
تحياتى
محمد
شكرا على الدعاء ومرورك
تحياتى
Post a Comment