Friday, July 8, 2016

ليه بحب صبا مبارك؟





 عايز تقيم موهبة بحق وحقيقي؟

  • شوف قدمت ايه وتابعها على مختلف مراحلها وقيم اختياراتها وهي وصلت لإيه ..انا مش هنسى لصبا دخلتها التاريخية في العهد ومشاهدها فيه اللي تصدرت وقتها تويتر والفيس بوك، ومش هنسى زين اللي كان حقيقي مسلسل قريب من قلبي وكان وسيلة قوية لدعم السياحة في الأردن وقت عرضه (وبالمناسبة هيتعاد على ابو ظبي يوم 9 يوليو)، وبنتين من مصر اللي كان بدايتها في مصر، مش هنسى بلقيس وتجسيدها العظيم لشخصية عظيمة، مش هنسى دورها في الشمس تشرق من جديد اللي خضني حقيقي، ومش هنسى دورها في شربات لوز، حكايات بنات، وغيرها من المحطات المهمة زي نسيم الروح، وموجة حارة والكواسر وغيرهم وأخيراً مش هنسى الدويتو بينها وبين كندة علوش اللي لعبت فيه الكيميا ما بينهم دور أساسي في افراح القبة.. أياً كان التقييم، مشاهدها من المشاهد اللي بالنسبالي يتوقف عندها.
  • يحسب لصبا حضورها القوي الملفت .. عندها قدرة رهيبة انها تشد انتباهك وتخليك تركز معاها في كل مشهد، بتاخدك بسهولة للعالم اللي هي بتجسده، يحسب لها انها بتشتغل على نفسها ومش واقفة في مكان واحد، يحسب لها ان شغلها في المسرح خدم في أدوراها لحد ما بقى حضورها في أي مشهد بياكل الشاشة ، يحسب لها الإجادة في الإختيار مش لمجرد التواجد، يحسب لها لكنتها اللي اتطورت لحد ما بقت اجدعها من اجدع مصري.. 
  • فيه ناس بتقدر تطلع احسن حاجة من اللي قدامها وأنا متأكدة تماماً ان لسة فيه كثير قوي عندها، الجدع اللي هيقدر ينبش جواها ويستفاد من وجود شخصية فنية زيها لإنها تستحق ولإن موهبتها حقيقي عظيمة.
  • من فترة صبا ظهرت في برنامج ختمت الحوار بجملة قالت فيها الخلاصة .. ومش غريب ان الكلام ده يطلع منها من شخصية "قارية" و"فاهمة" و"مركزة" و"مسؤولة" و"موهوبة" حقيقي زيها .. مش غريب يطلع من شخصية لامسة الأرض رغم اي نجاح بتحققه إلا انها بترجع تاني وتعيد حساباتها .. قالت:
  • "يارب افضل كده وما اضحكش على نفسي لإن المكان اللي احنا فيه لما بنبتدي نتعرف سهل جداً يتضحك علينا وسهل جداً نفتكر إننا حاجة أكبر من قيمتنا الحقيقية، وسهل جداً نعتبر ان احنا مبنتهزمش وإن إحنا فظيعين ورهيبين وهنفضل عالقمة والكلام ده كله مش حقيقي .. سهل انك ترجع للصفر وتنزل لتحت الصفر، وسهل جداً يتضحك عليك وتعمل حاجات وحشة عشان إنت فاكر إنك عظيم .. يارب خليني في مكاني وأمشي خطوات قد كده، بس أبقى واعية أنا مين.. وفين نقط ضعفي قبل النقط اللي انا كويسة وشاطرة فيها"

Featured Post

ليه بحب صبا مبارك؟

 عايز تقيم موهبة بحق وحقيقي؟ شوف قدمت ايه وتابعها على مختلف مراحلها وقيم اختياراتها وهي وصلت لإيه ..انا مش هنسى لصبا دخلتها ال...